في المتــــــرو ..

دايما أسلوب الكاتب بيجذب كتير من القراء أنهم يقلبوا الصفحة .. لكن لو انت بتقرا لغاية دلوقتي يبقى انا قدرت أستفزك علشان تكمل أول سطرين .. ولو عايز تعرف بلاوي المترو في مصر يبقى ممكن تقرى كمان سطرين 
هو في كلام كتييير جدا عن المترو .. بداية من السواقين اللي بيحسسونا أننا في الملاهي من كتر "المرجحة " اللي بيعملوها فينا مروراً بالزحمة والخنقة من 9 الصبح ل 6 المغرب وانتهاءً بالعالم الفاضية اللي مالية كل المحطات ..

أولا السواقين .. بعضهم يعني .. كانوا عجلاتية وعمرهم ما خدوا دورات تدريبية في فن قيادة المترو لدرجة أني بركب في أول العربية وأنزل دايخ من آخرها ..

لكن فعلا في حالة واحدة بدخل وبخرج من نفس المكان .. والكلام ده بيكون من 9 الصبح ل 6 مساءً لأني أساسا بكون شبه بوستر علي باب المترو ..

تعرفوا كل ده عادي .. ومش مشكلة بالنسبالي .. بس في حاجات تانية كتير بايخة ..

لما تكون واقف ونفسك تعد .. وأول ما يفضى المكان اللي قدامك .. والله اللي قدامك أنت .. تلاقي ألف واحد بيقعد وكأنك مش موجود اطلاقاً .. وطبعا بتكون واقف بقالك ساعة والأستاذ يعد ولا حتى يبصلك ..

أو تلاقي واحده سايبة عربة السيدات وواقفة قدامك وعماله تدوخ .. وطبعاً الشهامة لازم تنقح عليك وتقوم زي البطل علشان الأُخت تعد .. أو واحدة يبقي معاها ولادها وهيا أساسا "ممرمطاهم" وراها في الشوارع وتيجي تشيلهم كلهم في عز الزحمة في المترو .. ياعيني ست غلبانة لازم نقعدها .. الغريبة أنهم دايما يطالبوا بالمساواة !! ويقولوا مش واخدين حقهم !! أنا مش فاهم المساواة اللي هيا أيه ؟؟ هتكلم عن المساواة دي بعدين علشان محدش يزعل مني ..

أنا شفت مواقف كتيرة للبنات والستات خنقتني .. منها _بعيداً عن المترو _ في المواصلات في الميني باص .. وكان كل اللي قاعد في الكراسي الأمامية بنات ودخلت ست كبيرة مش قادرة تقف .. والبنات شايفينها تعبانه بس هما في عالم تاني .. ومش في دماغهم أبدا الست الكبيرة اللي زي والدتهم .. واللي كمان " وهن العظم منها " .. لدرجة أني قمت من أخر الباص وأخدت الست وقعدتها .. ساعتها بس قررت أني مش هقوم علشان أقعد بنت أبداً .. إلا طبعاً في حالات أنا أقدرها كويس .. لأن برضو مش كل البنات كدة ..

في بقي" عمال شحاته " أو " مهندسين شحاته " أو يمكن رؤساء مجلس ادارة دا أقل واجب .. بشوفهم دايما في المترو وكل يوم بيقولوا نفس الكلام .. وهما غلابة قوي لدرجة أنهم _صدقوني_لسه لغاية دلوقتي بنظام الكارت ..

النهارده كنت في مشوار ..

وأنا راجع بالمترو شايف منظر جميل قوي .. المترو رايق وفي ست زي القمر _بسكوتة يعني _ قاعدة قدامي لابسه بنطلون درتي كاوبوي وكمية اكسسوارات معرفش أوصفها .. المهم أن هيا هاي كلاس ع الاخر ..

وبعدين الراجل اللي جمبها قام وقعد مكانه راجل فقير جداً .. جدا بمعني الكلمة .. وطبعا علشان مكنش معايا السماعات بتاعتي فضلت أتخيل دماغ الراجل فيها أيه .. هو تقريبا حس أنه كائن غريب ..أو شبه منحرف في الهندسة .. وجوده في الحياة زي عدمه .. لكن أنا بصيت من زاوية تانية خالص ..

أن الحكومة _ اللي بتهتم دايما بالمواطن البسيط_ لما فكرت في المترو كان همها الأول التقريب بين طوائف الشعب المختلفة لأنك لو شفت الراجل كان بيبص ازاي للموبايل بتاعها هتعرف أنه كان تحت تأثير مخدر .. بس فعلا لو فكرت هتلاقي أن المشهد ده صعب يتكرر تاني في أي مكان غير المترو..

اتأكدت كمان أن المترو ده أكتر مكان ممكن للشخص أنه يكلم نفسه فيه لأن دماغنا بتبقى فاضية جدا واحنا قاعدين مستنيين المحطة اللي هننزل فيها ..

بس لما شفت راجل أجنبي وهو بيقرا علي ما تيجي محطته _ مش زينا في بعض الأحيان لما بندعي الثقافة وغالباً بيكون أخرنا جرنان هابط أوعدد الحوادث بتاع سنة 90 _ اكتشفت أننا فعلا شعب فاضي ويمكن كتير مننا تافه ..

وصدقني .. لو أنت دايما بتركب المترو لأكتر من 4 محطات _أو أي مواصلة تانية_ من غير ما تستفيد بالوقت ده .. يبقي ..

يبقي لازم تاخد بالك .. لأن فعلا الثانية اللي بتعدي دي غالية جداً.. ممكن تدخلك الجنة .. وبعد الشر بعد الشر .. ممكن العكس .. بس اللي لازم تتأكد منه أن عمرها ما هترجع تاني ..وأنها إما في ميزان حسناتك أو سيئاتك ..

هو لسه في حاجات كتير في المترو بايخة بس مينفعش نقولها هنا .. وبعدين أنا خلاص محطتي الجاية

أيه هو أنا مقولتلكوش ؟؟

أصل أنا .. قاعد ..

في المترو